Qaranlıq Rejim
Image
  • bazar, 22 noyabr 2026
ABŞ və İran arasında gizli təmaslar: Pentaqon Bəhreyndəki radar sisteminin vurulması iddialarını təkzib etdi

ABŞ və İran arasında gizli təmaslar: Pentaqon Bəhreyndəki radar sisteminin vurulması iddialarını təkzib etdi

Yaxın Şərqdə hərbi-siyasi gərginliyin yüksək həddə çatdığı bir vaxtda Vaşinqton və Tehran arasında pərdəarxası diplomatik danışıqların aparıldığı, eyni zamanda bölgədə qarşılıqlı hərbi ittihamların səngimədiyi bildirilir. 
CNN telekanalının yaydığı məlumata görə, ABŞ və İran rəsmiləri bölgədə yeni genişmiqyaslı qarşıdurmanın qarşısını almaq məqsədilə Qətərin vasitəçiliyi ilə gizli təmasları davam etdirirlər. Mənbələr bildirir ki, tərəflər vasitəçilər tərəfindən hazırlanmış çərçivə sənədi üzərində işləyir. Danışıqların əsas mövzularına İranın xaricdə dondurulmuş milyardlarla dollarlıq aktivlərinin açılması, sanksiyaların yumşaldılması, Hörmüz boğazında gəmiçiliyin bərpası və Tehranın nüvə proqramı ilə bağlı öhdəliklər daxildir.
Diplomatik səylərlə paralel olaraq regionda hərbi insidentlər də gündəmdədir. Euronews xəbər verir ki, İran İslam İnqilabı Keşikçiləri Korpusu (SEPAH) ölkənin cənubundakı Sirik liman şəhərində rabitə qülləsinə endirilən hava zərbəsinə cavab olaraq Bəhreyndə ABŞ ordusuna məxsus erkən xəbərdarlıq radar sistemini vurub məhv etdiyini bəyan edib. 
Lakin ABŞ Müdafiə Nazirliyi və Mərkəzi Komandanlığı (CENTCOM) SEPAH-ın bu iddialarını rəsmi şəkildə təkzib edib. Pentaqonun açıqlamasına əsasən, İran tərəfindən Bəhreyn istiqamətində buraxılan iki hücum pilotsuz uçuş aparatı (PUA) ABŞ hava hücumundan müdafiə qüvvələri tərəfindən vaxtında ələ keçirilərək zərərsizləşdirilib. Hadisə nəticəsində hərbi obyektlərə heç bir ziyan dəymədiyi və xəsarət alanın olmadığı vurğulanıb. 

 

Şərh / Cavab göndərən